作為一個旅遊系列書作者，我經常面對新朋友這樣的反應：
「嘩！你就好啦！好羨慕你呀！」（大家似乎都好鍾意用「羨慕」別人的工作做開場白）
「嘩！你就好啦！咁咪可以唔駛錢去旅行囉！」（我都想！錢，多多少少都要駛D嘅）
「嘩！你就好啦！係咪可以食嘢唔駛俾錢？」（的確偶然可以白吃白喝，這樣就伸延到另一個話題了）
「嘩！你就好啦！成日住靚酒店！」（偶然啦！我住幾十蚊床位或爛到爆的旅館仲多）
「嘩！你就好啦！唔駛返工⋯⋯」 （我重申：對我黎講，去旅行同寫字就係返緊工嘞！）
有時我聽到上述的對話，由最初有點唔好意思，到後來幾乎變得麻木，只是報以微笑並點頭說：「係架！筍工黎架！」來回應。
筍唔筍見人見智啦！
迫車趕船趕飛機行得快絕對是基本動作！又不需要十項全能或者精通多國語言的，不過最好擔得抬得食得兼度度都瞓得！唔好怕醜、怕黑、怕鬼或者怕曱甴。這還未計很多時也要在旅途上趕寫作死線，無論你早上動感跑跳碰完，晚上有多疲乏的身軀或靈魂，都是要－交－稿－的！簡單來說，做旅遊作者就是要堅持著「能屈能伸」的精神！嘩，突然連我自己都覺得份工作好神聖呀！
*photo credit : Mr. Joe Lam
